Дархан-Уул аймгийн хэмжээнд 500 гаруй харааны бэрхшээлтэй иргэд байдгаас 220 гаруй нь хөдөлмөрийн насныхан, 50 гаруй нь 0-16 насны буюу хүүхдүүд байгаа нь ихээхэн анхаарал татаж байгаа юм. Иймд аймаг орон нутгийн зүгээс эдгээр иргэдэд чиглэсэн тууштай бодлогыг хэрэгжүүлэх шаардлага тулгараад байгаа тул аймгийн удирдлагууд онцгой анхаарал хандуулна гэдэг найдаж байна. Чуулганд оролцогчдын зүгээс ч 2017 оны орон нутгийн төсөвт ХБИ-дэд зориулсан тодорхой төсөв суулгуулах нь чухал хэмээн үзэж байв. Тэд чуулганы төгсгөлд дээрх төсөвтэй холбоотойгоор өөр, өөрийн аймгийн ИТХ болон ЗДТГ -т албан хүсэлт гардуулах юм байна.
Мөн үеэр Азийн хөгжлийн банкны санхүүжилтээр Дархан-Уул, Дорнод, Архангай, Хөвсгөл, Дундговь, Ховд зэрэг зургаан аймагт ХБИ-ийн “Хөгжлийн төв”-ийг 2017 оноос байгуулахаар болсон таатай мэдээг Хүн амын хөгжил нийгмийн хамгааллын яамны /ХАХНХЯ/ Хөгжлийн бэрхшээлтэй иргэдийн Хөгжлийн хэлтсийн дарга Д. Батдулам дуулгалаа.
Тус төв нь тухайн бүсийнхээ нийт иргэдэд чиглэсэн үйл ажиллагаа явуулна гэдгээрээ онцлогтой. Тухайлбал: хүүхэд багачууд өөрийгөө хөгжүүлэх дугуйланд хамрагдах, спортоор хичээллэх, аймаг, сумын ӨЭМИ-ийн эмч, сувилагчийг сургалтанд хамруулах, иргэдэд дохионы хэл заах зэрэг олон ажил энэхүү төвд өрнөнө.
Эдгээр өдрүүдэд Төслийг зохицуулагч Ж.Оюунгэрэл Данийн Хараагүйчүүдийн нийгэмлэгээс хэрэгжүүлж байгаа “Хөгжиж буй орнуудын хараагүйчүүдийн байгууллагуудыг чадавхжуулах төсөл”-ийн хэрэгжилт, Мэргэжил сургалт үйлдвэрлэлийн төвийн захирал Б.Ганзориг Монгол Улс дахь харааны бэрхшээлтэй иргэдийн хөдөлмөр эрхлэлт ба мэргэжлийн боловсрол олгох сургалт, АШУҮИС-ийн багш нар Харааны бэрхшээлтэй иргэдийн өмнө тулгамдаж буй асуудлаар нэг бүрчлэн ярилцах зэрэг ач холбогдол бүхий сургалтуудыг ХБИ-дэд зориулан явуулна.
