Шинэ короновирус халдварт цар тахлаас ард иргэдээ хамгаалах үйл ажиллагааг дэмжих тухай аймгийн ИТХ-аас гаргасан уриалгыг Дархан-Уул аймгийн иргэд, ААНБ-ууд дэмжиж, мөнгөн болон эд материалын хандив үзүүлсээр байна.

Одоогийн байдлаар /2020.03.26/ аймгийн Онцгой комисст 150 гаруй сая төгрөгийн хандив цуглаад байгаа юм.

Энэхүү хандивын аянд өнөөдөр /2020.03.27/ Дархан Меат фүүд ХХК-ийн хамт олон нэгдэж, хонь, үхрийн 150 кг махыг хандив болгон өглөө.

Аймгийн Засаг дарга бөгөөд аймгийн Онцгой Комиссын дарга С.Насанбат энэ үеэр хандивын махыг 4 дүгээр сарын 1-ээс эхлэн сүлжээ дэлгүүрээр худалдан борлуулж, бэлэн мөнгийг Онцгой комиссын дансанд байршуулж, улмаар короновирусээс урьдчилан сэргийлэх үйл ажиллагаанд зарцуулах болно гэв.