Өндөрширээт сумынхан үндэсний хувцсаараа дэгжирхэж, монгол ёс заншлыг илэрхийлсэн ардын наадгайн төрлүүдээр тэмцээн зохион байгуулжээ. Дээлтэй монгол өдөрлөгт хүрэлцэн ирсэн байгууллага тус бүр эдийн дээд таван өнгийн хадагны өнгөнөөс сугалж тухайн өнгө бүхий дээл хувцасаар ижилссэн нь шинийг эрэлхийлсэн, өнгөлөг, утга учиртай байсныг онцолж байна. Энэ үеэр бүх оролцогчид Говийн ноён хутагт Д.Данзанравжаагийн “Үлэмжийн чанар”-ыг дуулж, сумын ЗДТГ-ын өмнөх цэцэрлэгт байрлах Даншигийн их аварга Баянмөнхийн хөшөөг нар зөв тойрч хүндэтгэл үзүүлжээ.

Дээлтэй монгол өдөрлөгийн онцлох арга хэмжээ нь монгол ёс заншлыг илэрхийлсэн тэмцээн бөгөөд баг тус бүр мэндчилгээ, монгол үндэсний хувцас хэрэглэлийг хэрхэн нэрлэх, хэрэглэхийг тайлбарлах, шагай шүүрэх, морь уралдуулах, сээр хугалах, монгол киноны хэсгээс сонгож тоглох зэрэг төрлөөр өрсөлдөж шилдгүүдээ тодруулсан байна. Үүнд:

• Сумын ЕББДСургуулийн “Галын дөл” баг
• Хаан банк, Төрийн банк, Халаалтын төвийн хамтарсан “Тэнгэр” баг
• Сумын Эрүүл мэндийн төвийн “Хүчирхэг” багууд эхний байрыг тус тус эзэлжээ.