Эрүүл байхын үндэс нь гараа тогтмол, зөв угаах гэж мэргэжилтнүүд зөвлөдөг. Нэгдсэн үндэсний байгууллагын /НҮБ/ Ерөнхий Ассамблейгаас жил бүрийн аравдугаар сарын 15-ны өдрийг “Дэлхийн гар угаах өдөр” хэмээн тунхаглаж, тэмдэглэн өнгөрүүлдэг аж. Энэ өдрийг тохиолдуулан Бүрэн сумын Эрүүл мэндийн төв, Ерөнхий боловсролын сургуулийн 10б ангийн сурагчид хамтран ЗДТГ-ын нийт албан хаагчдад “Эрүүл гар” сэдэвт сургалтыг зохион байгуулжээ. Сургалтанд сурагчдын өөрсдийн гараар хийсэн ханын сонин, гараа хэрхэн цэвэр байлгах тухай зөвлөмж, гар угаах, халдваргүйжүүлэхтэй холбоотой тараах материалыг танилцуулсан байна. “Эрүүл гар” сургалтанд хамрагдсан төрийн албан хаагчид гарын ариун цэврийн мэдлэгээ дээшлүүлж, гэр бүл, үр хүүхэд, эргэн тойрныхоо хүрээнд эрүүл гарны ач холбогдлын талаар биечлэн үлгэрлэх, мэдээлэл түгээх үүргийг хүлээсэн үр дүн бүхий сургалт болжээ.
