“Иргэдийн оролцоо хөгжлийн түлхүүр” ТББ-аас санаачлан Дархан сумын 15 дугаар багийн иргэдийн дэмжлэгтэйгээр “Шинэ гудамж 1” төслийг 2013 онд эхлүүлж 2016 оныг хүртэл үргэлжлүүлэн хийсэн.
Харин 2017 онд тус багийн мангирт-2 гудамжинд “Шинэ гудамж - 2” төслийг тус гудамжны 11 айлын иргэд, Дархан-Уул аймгийн Захирагчийн ажлын алба, БНСУ-ын Бусан хотын Дүнрэ, Ратори клубтэй хамтран нийтдээ 12 сая төгрөгийн төсөвт ажлыг хийсэн юм. Үүнд 450м явган хүний засмал зам, 420 метр блокон хайс, модон хашааг байгуулж иргэд өөрсдөө амьдарч буй орчин нөхцөлөө сайжруулсан билээ.
Харин энэ онд энэхүү төсөл Дархан сумын 15 дугаар багийн 7 дугаар хэсэгт үргэлжлэн “Шинэ гудамж - 3” төсөл нээлтээ хийлээ. Нээлтэд Улсын их хурлын гишүүн Д.Хаянхярваа, Дархан сумын ИТХ-ын дарга Ж.Балжинням, ИТХ-ын төлөөлөгч Б.Даваасамбуу, Г .Мөнхцэцэг, сумын Засаг даргын орлогч Д.Батбаяр, болон зохион байгуулагчид, оршин суугчид, дэмжлэг үзүүлж буй аж ахуй нэгж байгууллын төлөөллүүд оролцлоо.
Энэхүү ажлын гол онцлог нь иргэд оршин суугчид амьдрах орчноо сайжруулахад олон нийтийн байгууллагатай хамтран бага өртгөөр чанартай бүтээн байгуулалтыг хийж байгаад оршиж байгаа юм. "Шинэ гудамж-3" төсөлд Дархан сумын 15 дугаар багийн 37 өрх хамрагдаж байгаа бөгөөд тэд замаа засан гудамжаа гэрэлтүүлж, мод тарьж хашаажуулах, камержуулах ажлыг хийх ажээ. Зохион байгуулагчид энэхүү төслөө үлгэр жишээ болгон орон даяар хэрэгжүүлж, өөрсдийнхөө амьдарч байгаа орчноо сайхан болгох аянг өрнүүлэх томоохон зорилтыг өмнөө тавьжээ.
