Доктор Т.Атарсайхан захиралтай “Ногоон буян” ХХК нь нийгмийн хариуцлагын хүрээнд 2018-2020 онуудад Дархан хотын ногоон байгууламжинд шаардлагатай мод суулгацыг нийлүүлэх, мэргэжлийн зөвлөн туслах үйлчилгээ үзүүлж ажиллах санал санаачилга гарган, аймгийн Захирагчийн ажлын албатай хамтран ажиллахаар болжээ.
Энэ ажлын хүрээнд өнөөдөр /2018.06.06/ аймгийн Засаг даргын тамгын газрын хүндэтгэлийн танхимд хоёр тал хамтран ажиллах гэрээнд гарыг үсэг зурлаа. “Ногоон буян ХХК” гурван жилийн хугацаанд нийтдээ 50500 ширхэг 6 төрлийн /шар хуайс, агч, хайлаас, улиас, голт бор, монос/ модны суулгацыг төлөвлөгөөний дагуу нийлүүлж хотын ногоон бүсийг бий болгох ажилд бодит хувь нэмрээ оруулах юм байна. Гэрээ байгуулах арга хэмжээнд аймгийн Засаг дарга С.Насанбат болон манай аймагт үйл ажиллагаа явуулдаг “Хуримтлалын бүлгийн холбоо”-ны 14 ахлагч уригдан оролцжээ.
