Мэргэжлийн хяналтын байгууллагын 2018 оны хяналт шалгалтын нэгдсэн төлөвлөгөө, Мэргэжлийн хяналтын ерөнхий газрын дарга, улсын ерөнхий байцаагчийн баталсан 01/11 тоот удирдамжийн дагуу Дархан сумын нутаг дэвсгэрт байрлах Хараа голын төмөр бетон гүүрний ашиглалтын үеийн төлөв байдалд аймгийн МХГ-ын Авто замын хяналтын улсын байцаагч Д.Баярсайхан Дархан сумын ЗДТГ-ын БОАХМэргэжилтэн Б.Батзулын хамт урьдчилан сэргийлэх хяналт шалгалтыг хийв. Тус гүүр нь 1991 онд ашиглалтад орсон бөгөөд 9 алгасал байгууламжтай "Т" хэлбэрийн 15 у/м дам нуруутай, 135 у/м гүүр юм. Гүүрийн зарим дам нуруу цууралт өгч сууснаас нурах аюултай болсон. Иймд засвар шинэчлэлийн ажлыг цаг алдалгүй зайлшгүй хийх шаардлагатай тухай МХГ-ын АЗХУ-ын ахлах байцаагч Ш.Гэрэлт-Одын 07/096/457 тоот дүгнэлт гарсан байдаг. Гэвч хөрөнгө санхүү нь шийдэгдэхгүй явсаар энэ онд улсын төсөвт уг ажилд 1 тэр бум гаруй төгрөг суусан аж. Харин одоо салбар яам нь яаралтай тендерээ зарлан гүүрийн засвар шинэчлэлийн ажлыг эхлүүлэхийг иргэд хүлээж байна. Уг ажлыг нэн даруй гүйцэтгүүлэх зөвлөмжийг ч МХГ-аас өгч байгаа юм. Түүнчлэн 2016 онд Дархан сумын ЗДТГ, ОБГ-аас хамтран тус гүүрэн дээр өндрийн хязгаарлалт, замын тэмдэг, тэмдэглэгээг төсөв хөрөнгө, хүн хүч гарган хийсэн ч өнөөдөр зөвхөн тээврийн хэрэгслийн жингийн хязгаарлалтын тэмдэг л үлджээ. Иймд алга болсон, бүдгэрч эвдэрсэн тэмдэг тэмдэглэгээ, өндрийн хязгаарлалтыг стандартын дагуу шинээр байгуулах, сэргээх зөвлөмжийг мөн хяналт шалгалт хийсэн улсын байцаагч холбогдох байгууллагад хүргүүлэхээр болжээ.