XVII дугаар жарны “Тийн унжлагат” хэмээх шороон нохой жилийн Билгийн тооллын хаврын тэргүүн сар “Цагаан сар”-ын баярыг тохиолдуулан 2017 онд хийж бүтээсэн ажил өөрсдийн идэвх санаачилга, хөдөлмөр бүтээлээрээ манлайлан ажиллаж шалгарсан баг, байгууллага, хамт олон, иргэдийг шагнаж алдаршуулав.
Аймгийн “САЙН МАЛЧИН”-аар Хонгор сумын малчин С.Энхбат, аймгийн “ТЭРГҮҮНИЙ ТАРИАЛАНЧ”-аар Орхон сумын тариаланч Д.Орхонбаяр, ШИЛДЭГ ФЕРМЕР-ээр Хонгор сумын фермер Н.Тойланхан нар шалгарлаа.
Тахиа жилийн “ОНЫ ОНЦЛОХ ХҮН”-ээр 2017 оны 12 дугаар сарын 1-ээс 3-ны хооронд Индонези улсын нийслэл Жакарта хотод болсон Ой тогтоолтын дэлхийн аварга шалгаруулах тэмцээний өсвөр насны ангилалд 30 минутын “Хоёртын тоолол” төрөлд 4665 цифр тогтоон алдалгүй санаснаар дэлхийн рекордыг шинэчилсэн амжилтаар Э.Лхагвадулам тодров.

“ТЭРГҮҮНИЙ БАГ”-аар Дархан сумын 8 дугаар баг, Хонгор сумын Буурал багууд шалгарсан бол “Нийгмийн хариуцлагыг хэрэгжүүлэгч хамт олон”-оор “ДДЦС” ТӨХК шалгарлаа. “Шинээр ажлын байр бий болгосон хамт олон”-ы шагналыг “Хан хөхий” ХХК хүртсэн байна. Тус компани өнгөрөгч онд 40 гаруй иргэнийг байнгын ажлын байртай болгожээ.

“Өсөх ирээдүй” ХХК “Орон нутгийн хөрөнгө оруулалт, бүтээн байгуулалтад хувь нэмэр оруулсан хамт олон”-оор шалгарч, “Хөдөлмөрийн аварга хамт олон”-оор аймгийн Нийтийн аж ахуй үйлчилгээний газар шалгарсан юм.

Нийт арван салбараас аймгийн “ХӨДӨЛМӨРИЙН АВАРГА”-уудыг тодруулсан байна. Үүнд:

1. Боловсролын салбарын хөдөлмөрийн аварга- Дархан сумын 4 дүгээр сургуулийн биеийн тамирын багш Ж.Ганболд

2. Дэд бүтцийн салбарын хөдөлмөрийн аварга - “ЦДҮС” ТӨХК-ийн Төвийн бүсийн салбарын Релей хамгаалалтын ахлах инженер Б.Наранбаатар

3. Аж үйлдвэрийн салбарын хөдөлмөрийн аварга- “Мөнх ундрам хүнс” ХХК-ийн нарийн боовчин Ж.Цэцэгсүрэн

4. Эрүүл мэндийн салбарын хөдөлмөрийн аварга- “Саран-Энх” Элит эмнэлгийн ерөнхий захирал Т.Сарантуяа

5. Санхүүгийн салбарын хөдөлмөрийн аварга - Аймгийн Статистикийн хэлтсийн ахлах мэргэжилтэн Б.Дэмид-Очир

6. Төрийн захиргааны салбарын хөдөлмөрийн аварга- Дархан сумын Засаг даргын Тамгын газрын Дотоод асуудал хариуцсан мэргэжилтэн Д.Тулга


7. Хууль сахиулах болон хууль хяналтын салбарын хөдөлмөрийн аварга- Аймгийн Прокурорын газрын шүүхэд төрийг төлөөлөх ахлах прокурор Б.Сүрмандах

8. Худалдаа үйлчилгээний салбарын хөдөлмөрийн аварга- Аймгийн Үсчин Гоо Засалчдын “АМИНА” холбоо ТББ-ын тэргүүн Т.Өлзиймаа

9. Соёл, урлаг, спорт, аялал жуулчлалын салбарын хөдөлмөрийн аварга-Биеийн тамир спортын газрын сагсан бөмбөгийн багш, дасгалжуулагч Д.Гүржав

10. Ашигт малтмал газрын тосны салбарын хөдөлмөрийн аварга- “НИК” ХХК-ийн Дархан нефть хангамжийн салбарын захирал Б.ЗОРИГОО нарын ажил үйлсээрээ тэргүүлж, хөдөлмөрийн амжилт гаргасан хүмүүс тодорч 2018 оны 2 дугаар сарын 13-ны өдөр аймгийн Залуучууд театрын их танхимд шагналаа гардан авлаа.