Аймгийн Засаг даргын үйл ажиллагааны хөтөлбөрт тусгагдсан Малчдын орлогын эх үүсвэр болсон малыг худалдан авах, зах зээлд нийлүүлэх замаар төр хувийн хэвшлийн хамтын ажиллагааг бэхжүүлж үйлдвэр байгуулан ажлын байр нэмэгдүүлэх зорилтын хүрээнд байнгын 40 хүнийг ажилтай орлоготой болгох “Дархан Эрдэнэ” мах комбинат нээлтээ хийлээ. Хүн амын нягтаршил ихсэх тусам хүнсний аюулгүй байдал энэ тэргүүнд тавигдаж байгаа энэ үед энэхүү үйлдвэр ашиглалтад орж иргэд эрүүл аюулгүй хүнс хэрэглэх боломжтой болж байна. Цаашлаад аймагт төвлөрөх татвар нэмэгдэх давуу талтай юм. Тус үйлдвэр нь нэг ээлжид өдөрт 100 толгой бод, 500 толгой бог малыг төхөөрөх хүчин чадалтай бөгөөд мах шулах, сэврээх, гүн хөлдөөх, зориулалтын өрөө, мах хадгалах агуулахтай юм байна. Дархан-Уул аймаг нь цөөнгүй тооны малтай аймгуудын тоонд багтдаг бөгөөд өвөлжилт хүндэрч магадгүй энэ үед махны үйлдвэр ашиглалтад орсноор малчдад өвлийн эрсдэлийг хохиролгүй даван туулах боломжтой болж байна.